ໂອກາດດັ່ງກ່າວທ່ານ ຈັນສະໝອນ ພົມມະແສງ ຄະນະປະຈໍາພັກແຂວງ ໄດ້ກ່າວວ່າ: ລາວ-ຫວຽດນາມ ແມ່ນສອງປະເທດອ້າຍນ້ອງ ຢູ່ແຫຼມອິນດູຈີນ, ມີເຂດນໍ້າແດນດິນ ຕິດລ່ຽນກັນຍາວ ກວ່າ 2.000 ກິໂລແມັດ. ປະຊາຊົນສອງຊາດ ເຄີຍມີມູນເຊື້ອສາມັກຄີຮັກແພງຊ່ວຍເຫຼືອກັນ, ເປັນບ້ານພີ່ເມືອງນ້ອງ, ເຄີຍກິນນໍ້າຮ່ວມສາຍ, ກິນປາຮ່ວມຫ້ວຍ, ມີວັດທະນະທໍາ ຮີດຄອງປະເພນີ, ແບບແຜນດຳເນີນຊີວິດທີ່ຄ້າຍຄືກັນ. ບົນພື້ນຖານສາຍພົວພັນບ້ານໃກ້ເຮືອນຄຽງ ແລະ ພື້ນຖານວັດທະນະທໍາດັ່ງກ່າວນັ້ນ ມັນໄດ້ເພີ່ມຄວາມຜູກພັນຮ່ວມມືກັນຕໍ່ສູ້ຕ້ານໄພທໍາມະຊາດ, ກໍ່ຄືຕ້ານກັບການຮຸກຮານຂອງສັດຕູພາຍນອກ ແລະ ຮ່ວມມືກັນ ໃນການປົກປັກຮັກສາ ແລະ ພັດທະນາສ້າງສາປະເທດຊາດທັງສອງ ໂດຍແມ່ນປະທານໂຮ່ຈິມິນ, ປະທານ ໄກສອນ ພົມວິຫານ, ທ່ານ ປະທານ ສຸພານຸວົງ ເປັນຜູ້ສ້າງຕັ້ງ, ບັນດາການນໍາຮຸ່ນສືບທອດ ແລະ ປະຊາຊົນສອງຊາດເປັນຜູ້ເພີ່ມພູນຄູນສ້າງສາຍພົວພັນດັ່ງກ່າວນັບມື້ນັບເຕີບໃຫຍ່ຂະຫຍາຍຕົວຢ່າງໝັ້ນຄົງຖາວອນຍິ່ງໆຂຶ້ນ. ສາຍພົວພັນຄວາມສາມັກຄີພິເສດ, ການຮ່ວມສຳພັນສູ້ຮົບ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ, ຫວຽດນາມ-ລາວ ແມ່ນສາຍພົວພັນທີ່ບໍລິສຸດຜຸດຜ່ອງ, ເປັນມໍລະດົກທີ່ລໍ້າຄ່າ ແລະ ຫາບໍ່ມີໃນໂລກນີ້ ແລະ ທັງເປັນປັດໃຈສຳຄັນຕັດສິນການຕີຊະນະສັດຕູຜູ້ຮຸກຮານ ແລະ ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງສອງຊາລາວ-ຫວຽດນາມ.

ໃນຕອນທ້າຍ ທ່ານ ຈັນສະໝອນ ພົມມະແສງ ຍັງຮຽກຮ້ອງມາຍັງ ນາຍ ແລະ ພົນທະຫານ, ນາຍ ແລະ ພົນຕຳຫຼວດ ຕ້ອງໄດ້ເສີມຂະຫຍາຍສາຍພົວພັນມິດຕະພາບແບບພິເສດ ລາວ-ຫວຽດນາມ ເຊິ່ງແມ່ນມໍລະດົກທີ່ລໍ້າຄ່າຂອງສອງຊາດ ທີ່ຄວນໄດ້ຮັບການປົກປັກຮັກສາ, ເສີມຂະຫຍາຍ ແລະ ສືບທອດໃຫ້ຮຸ່ນຄົນຕໍ່ໄປຈົນຊົ່ວນິລັນດອນ.

ຂ່າວ : ອິນທະວົງ

ພາບ :​ແຂກດາລາ